برنامج عضو في الطاولة - الحلقة الثانية

سم الله الرحمن الرحيم

السلام عليكم ورحمة الله وبركاته

قبل فترة كان في مناسبة جميلة وهي أول لقاء لثلاث اعضاء في المنتدى في مكان واحد ولذلك حبيت اعمل مقابلة شخصية مع العضوين اللي استضفتهم في احد

مقاهي مدينة الرياض بالسعودية

وضيفنا اليوم هو احد اعضاء المنتدى المؤسسين وإشتهر بموضوعه القيم واللي أنتشر في أكثر من 300 منتدى عربي (قصة أبطال الممالك الثلاث)

هو الاخ night^wolf عضو المنتدى وفي ما يلي نص الحوار

ممكن في البداية تعرفنا عن نفسك بشكل مختصر؟؟

مشعل دخيل الله الحربي 23 سنة خريج جامعة الكويت كلية الاداب قسم التاريخ - حاليا اعمل اعمال حرة مع بعض الاصدقاء

ولي اهتماماات بحثية في تاريخ الممالك الثلاث سعودي الاصل كويتي المولد والنشأة وعندي جنسية البلدين والله يعز الخليج

في البداية نحب نعرف اول يوم لك في المنتدى شلون كان؟؟

انا كنت عضو في منتدى جيم ماستر للالعاب وكنت انزل مواضيع عن تاريخ الممالك الثلاث واللي تعرفت عليه من

خلال دراستي بالكلية وساهمت الالعاب والانمي انها تعطيني فكرة جميلة جدا عن اللعبة وسجلت بالمنتدى لكي

ازيد من معلوماتي بالتاريخ ولقيت فرصة كتابة رسالة عن الممالك الثلاث مفتاج جيد لكي احصل على درجة الماجستير

اوكي اخوي مشعل نحب نعرف ابرز ذكرياتك عن تاريخ الممالك الثلاث ؟؟

والله اذكر قبل تاسيس المنتدى كان شباب المنتدى الاوائل ومنهم الاخ اتش اس ام والاخ شينجي تاكيدا والاخ سون جيان من

نخبة العارفين بتاريخ الممالك الثلاث وكان فكرة انشاء المنتدى فكرة جميلة واذكر وجهت لي دعوة من قبل الاخ اتش اس ام ولكني

تاخرت في التسجيل لغاية السنة الماضية

موضوع (قصة أبطال الممالك الثلاث) موضوع شهير وكسر الدنيا سنة 2006 وساهم في تعرف الاعضاء القدامى ببعض

وانشاءهم للمنتدى حدثنا اكثر عن التجربة ؟؟

والله فكرت في تنزيل موضوع عن الممالك الثلاث يكون روائي ويتكلم بشكل اكثر عن اللعبة ويعطي الجميع فكرة حلوة عن اللعبة

وصدقني ما كنت اتوقع الشهرة الكبيرة للموضوع ولا التكريم الكبير اللي حصل وصراحة منتدى بحجم جيم ماستر واعضائه يرشح

الموضوع كأفضل موضوع لسنة 2006 ويثبته في الصفحة الرئيسية هذا شرف كبير لي وما انسى مجهود الاخ سعد بن سيف

رحمه الله ومجهود زميلنا الثالث ارتيكس في تنزيل الموضوع

طبعا الموضوع نقل حسب بحثي في موقع قوقل لاكثر من منتدى خصوصا منتديات كبيرة . وهذا عدد كبير والموضوع اصبح اشهر من

نار على علم هل انت متضايق من السرقة الفكرية لموضوعك ؟؟

عالم الانترنت عالم لا شاطي له وصحيح تضايقت خصوصا من الناس اللي شالوا اسماء كتاب الموضوع ولكن يكيفني اعتراف ادارة

المنتدى بأني صاحب الفكرة مع الاخ سعد الله يرحمه وزميلنا الثالث والمنتدى منتدى عربي عن الممالك الثلاث ويعتبر نافذة كبيرة على

هالمجال

بخصوص المناقشات التاريخية ما نشوف لك مشاركات كثيرة فيها يا ليت نعرف السبب في ذلك ؟؟

بصراحة وبدون مجاملة فيه تحييز كبير وواضح تجاه اراء عضو معين واغلب المواضيع تشهد علي كلامي لا اعرف ان

كنت نوع من المجاملة ام راي شخصي ولكن فيه اكثر من موضوع يستاهلون كل تقدير لانهم اثبتوا ان المناقشين

على قدر عالي من الالتزام باداب الحوار والمصداقية والاسلوب الجميل ويشكرون على ذلك

طيب بخصوص الادارة كيف تشوف المنتدى ماشي؟؟

الادارة جيدة جدا وفيه تنسيق جميل بين اعضاء الادارة بس اتمنى انه الاقسام النقاشية تنال نصيب اكبر من الاهتمام

لانه تستحق يكون لها مسؤول خاص خصوصا انها اهم اقسام المنتدى

رايك بالموسوعة؟؟

لا تعليق بس فقط تحتاج تطوير وطبعا الفكرة حلوة حيل موفقين الشباب

طيب بخصوص القروب تعليقاتك عليه ؟؟

مشروع ممتاز واشوف انه الافضل من بين مشاريع الادارة لانه جمع الاعضاء وجعلنا ترابط الاعضاء يكون افضل واكيد

الترابط ياثر على المنتدى بشكل ايجابي

بالنسبة لمشروع الدورات النقاشية التاريخية كيف تقيم الفكرة ؟؟

وايد حلوة والكورسات بتخلي الكل يتعلم زيادة والفكرة تستحق الدعم من الاعضاء لتنجح

طيب بعيد عن المنتدى ودنا نعرف اهتماماتك الشخصية ؟؟

التاريخ . اعشق قراءة كتب التاريخ العربي وتاريخ الجزيرة العربية والدول العربية والعالم بشكل عام وتركيزي ينصب على التاريح

الاسيوي لانه يستحق الدراسة بشكل كبير خصوصا انه عالمنا الحديث يعتمد على التاريخ بشكل كبير

يكفي القصص والعبر التاريخية ويكفي انك تامل حياة الناس اللي قبلك اللي تفكيركم وديانتهم وعقيدتهم بعيدة كل البعد عنك

وعندي اهتمامات عديدة مثل الحداق والكرة بس حبي للتاريخ طاغي على كل شي سواه

بالنسبة لك اخوي مشعل شلون كانت طفولتك ومرحلة الدراسة في المدارس؟؟

كنت شيطان الله لا يوريك (يضحك بشدة) دايم ازعج المدرسين والطلبة وكنت موذي خلق الله بس ركدت عقب الثانوية

بالدراسة كنت مو مال دراسات علمية ورياضيات وكيميا ووجع راسك غير انه المناهج الكويتية معقدة ووزارة التربية قاعدة بحلج

الطالب لكن متامل خير من الوزير المليفي انه ينظر لخريجين التاريخ ويطلع الوظائف من الادراج

بعد تخرجك من المرحلة الثانوية شلون اخترت تخصصك الجامعي ؟؟

انا اموت بالتاريخ وعاشق للتاريخ وعندي استعداد اقعد ساعات قدام كتاب تاريخي يكون محايد والكاتب من اللي موثوق فيهم

ومحايد في اطروحاته

افضل لحظة في حياتك ؟؟

(بعد تفكير طويل) واجد مواقف حلوة ماكو افضل

اسوء لحظة في حياتك ؟؟

يوم دعمت واحد راكب سيكل خصوصا انه الرجال اغمي عليه وحسبته مات وصراحة مت رعبة وخوف يومها

لحظة تود الوصول اليها ؟؟

اللحظة اللي اشوف فيها الكويت والسعودية والامم العربية على قلب واحد

لو رشحت لمنصب وزاري في بلدك وش راح تختار ؟؟

وزارة التربية عشان اخلي مقررات التاريخ مقررات الزامية للكل وعيب شاب في الثانوية ما يعرف زين عن التاريخ القديم او الحديث

الا قشور بس

لو طلب والدك منك الزواج الآن وش راح تكون ردة فعلك (اضحك بشدة) ؟؟

اطق اصبع وازهب عمري للعرس

لو قررت الهجرة من بلادك الى بلاد اخرى وين راح تكون وجهتك ؟؟

ما ابيع تراب الكويت بفلوس الدنيا كلها وصعب اعيش بديرة ثانية بس لو ولا بد اكيد بروح قريب مثل السعودية او ابو ظبي

والخليج كله على راسي والله


حدثنا شوي عن حياتك اليومية وشلون تقضي اوقاتك ؟؟

مع الاهل والربع كلهم وديوانيات وحداق وبحر (ختم الجودة الكويتي خخخخ) بس لما اقعد لحالي اشوف انه كتب التاريخ هي

افضل صديق للانسان خصوصا لما تقرا عن الشخصيات الممتازة

بخصوص اصدقائك ودنا تعطينا تصنيفك للاصدقاء في حياتك الشخصية ؟؟

اكيد الربع مثل الطيارة درجات اكو ناس درجة اولى وناس سياحي وناس ما تفكر حتى تحطهم ويا الجناط

هل تعتبر اصدقاء الواقع مقربين اكثر من اصدقاء النت ؟؟

والله ما يعيب الواحد انه يكون صداقات من النت بس ربع النت اغلبهم مو صريحين وسيده واشوف انه الثقة لازم تكون موجودة

هالسؤال يقودنا لسؤال اخر وش رايك باللي ما يحب يتكلم عن نفسه بشكل خاص ويحب انه يكون شخص غامض للي حوله؟؟

بكيفه بس اكو ناس تحوشهم حالات نفسية شينة من هالموضوع وعموما ماكو احلى من ربع يشيلون وقت ما تلف الدنيا فيك

كلمة أخيرة لك اخوي مشعل ؟؟

مشكور حبيب قلبي على المقابلة وان شاء الله اكون خفيف طينة على المشاهدين وان شاء الله دوم نشوفكم على خير يا رب

والاخ تركي اشكره على اخلاقه العالية وروحه الطيبة واعتذر لكل من اسات له وموفقين



الحلقة القادمة ضيف الحلقة سيكون عضو بارز في المنتدى في الاسبوع القادم باذن الله

تشكرات

موضوع أكثر من روعة وحلقة رآئعة بصرآحة

أشكر منكـ هذا المجهود أخوي أبو عزيز

شبآب لو سمحتوا ترى كل شئ يبدأ من زلة لسآن وأخآف يتعدى هالكلآم حدوده

رجآء لين هني ووقفوا أشوف نغزآت وآيد كل وآحد ينغز

شبآب ايش فيكم ترى مآ في شئ يستآهل هالكلآم

أرجو انكم تريحوا عقولكم عن الكلآم إلي مآله دآعي

والمعذرة من الجميع

لا لا حرام عليك

الله مو قصدي شي بس اسأل عن بعض الاشاعات ، بس راح امسح الرد على شانك

مشكور يالغلآ أقدر لكـ موقفكـ ^^

حذفت السؤال بالكامل , اخوي مشعل رأيك على عيني وراسي والله لكن ما ينقال بهذي الطريقة يعني المفروض يكون اسلوبك احسن من كذا وما تدق في الكلام .. طبعاً كل الحكام لهم وعليهم وكلهم بشر ومستحيل ما يغلطون الله يتجاوز عنهم ويهديهم ويجمع بينهم ويوحد كلمتهم "

بالنسبة لردك محمد والله آسف لكن اضطريت احذفه عشان ننتهي من السالفة وما تتطور "
وفعلاً قطر أكثر دولة في الخليج تطورت وبوقت قصير ودايما تحلصها أول دولة في الإحصائيات سواء في منطقة الخليج او على المستوى العربي وحاكمكم متواضع وسياسي ممتاز وبالفعل دولة صغيرة مقارنة بالدول المجاورة لكن انجازاتها كبيرة وترفع الراس ..

تحية لكل قطري وكويتي اماراتي وسعودي عماني وبحريني اردني ويمني ومغربي وكل خليجي والوطن العربي كله ^^"( زودتها هاه ) ,,

بالتوفيق شباب "

اعتذر للجميع عن السؤال اللي سبب المشكلة واشكر اخوي مصلح على حذف السؤال

وصدقوني الكل فوق راسي وان شاء الله لم يتكرر هذا الخطا مرة اخرى

اعتذاري للجميع

صراحة إستفدت جدا من الفقرة اللي تكلم فيها عن موضوعه الشهير . وبنفس الوقت حضرت بنفسي تسجيل هالحوار الشيق ههههههه . يستاهل الأخ مشعل كل خير وإلى الأمام

يستاهل اخوي مشعل كل تقدير ومشكور على الصراحة ...
وكذلك صاحب الموضوع الاخ ابو عزيز..

ملاحظة / سبحان الله اسمك مثل اسمي
ان اسمي مشعل الحربي
وانت كذلك ... انا من النادر القى واحد اسمه مشعل فيوم شفت واحد اسمه مثلي بالتمام استغربت..